ამერიკის თავდაცვისა და სახელმწიფო დეპარტამენტის ყოფილი მაღალჩინოსანი, ამჟამად კი საგარეო ურთიერთობათა საბჭოს საპატიო პრეზიდენტი, ლესლი გელბი, ობამას გუნდში სავარაუდო გადაადგილების პროგნოზს აკეთებს. მისი აზრით, თავდაცვის მდივანი რობერტ გეიტსი თანამდებობას 2012 წლის საპრეზიდენტო არჩევნებამდე დატოვებს. ექსპერტი არ გამორიცხავს, რომ მას სახელმწიფო მდივანი ჰილარი კლინტონი შეცვლის.
დღესდღეობით დემოკრატებს საზოგადოება დიდად არ ენდობა, როცა საქმე ეროვნულ უსაფრთხოებას ეხება. ქალბატონი კლინტონი ამ მხრივ გამონაკლისია. იგი ეროვნული უსაფრთოების მრავალ საკითხში კონსერვატორების პოზიციას იზიარებს, კარგი ურთიერთობა აქვს სამხედრო მაღალჩინოსნებთან და 10-დან 25%-მდე ასწრებს პრეზიდენტ ობამას პოპულარობით.
2012 წლის შემდეგ გელბი შესაძლო გადაადგილებათა შემდეგ ფაზას გვთავაზობს: ობამას ახალ ადმინისტრაციაში კლინტონი ვიცე პრეზიდენტად, ჯო ბაიდენი კი სახელმწიფო მდივნად. მისი აზრით, თუ ობამა 2012 წლის საპრეზიდენტო არჩევნებს წააგებს, 2016 წლის საპრეზიდენტო კანდიდატად დემოკრატები კლინტონს წარადგენენ. ამ დროისთვის იგი 69 წლის იქნება.
ვაშინგტონურ კულვარებში, თეთრი სახლის ადმინისტრაციის უფროსის, რამ ემანუელის თანამდებობიდან წასვლასაც არ გამორიცხავენ. განსაკუთრებით მას შემდეგ, რაც ემანუელმა ღიად განაცხადა, რომ ბარაკ ობამას გუნდის იდეალიზმით დაიღალა და პრეზიდენტის წრეში მოყვარულ პოლიტიკოსთა სიმრავლით იმედგაცრუებულია. ოფიციალურად ემანუელის წასვლის თარიღები ჯერჯერობით არ კონკრეტდება.
თუმცა, დაზუსტებულია თეთრი სახლის საბიუჯეტო უწყების დირექტორის, პიტერ ორსზაგის თანამდებობიდან წასვლის თარიღები. ორსზაგი, რომელიც ობამას ჯანდაცვის რეფორმისა და ფინანსური სტიმულირების პაკეტის ერთ-ერთი მთავარი ლობისტი იყო, პრეზიდენტის გუნდს ივლისში დატოვებს.
ობამას გუნდში საჭადრაკო როქებსა და ცვლილებებს ექსპერტები და ჟურნალისტები ნოემბრის შუალედური არჩევნების შემდგომაც ვარაუდობენ.
No comments:
Post a Comment